Im Himmel dob gat's fürchtig hektisch zua,
und in d'r G'schenkles-Werkschtatt gibt's glei gar koi Ruah,
weil d'r Niklaus und de kloine Zwergamand,
woiß Gott, no was zum Richta hant.

Spielzuig wärt für alle Erdakinder g'macht,
und dau hat's klopft und g'hämmrat, det laut kracht.
Aus Holz a kloina, bunta Zugbah',
an aufziehbara, luscht'ga Hampelmah,
kloine Püppla mit Engelshaur und Kirschamund -
in d'r Himm'lswerkschtatt gibt's koi ruhiga Schtund.

Jetzt wicklat d' Eng'la allz in schean' Papierla nei,
weil nemma lang, nau treffat earschte Wunschzett'l ei'.
Als d'r Petrus da earschta Haufa Zett'l bracht,
dau hant dia himmlische Heerschara groaße Auga g'macht.
Wunschbrieaf für Wunschbrieaf macht ma' auf,
aber off koim oinziga schtandat Holzspielsacha drauf.

Ja spinnat dia Kind dau donda jetzt all' mitanand?
Des glaubsch ja it, was dia Wed'l für Wünsche hant.
Monschterla mit fuirige Auga und grasgreane Ohra.
Ja, hant dia Kind'r jetzt da Verschtand verlora?
Computerschpiel, wo ma' Raketa ahschießa kah,
und d'rzua an wilda grilliga Roboter -Affamah.