Gedanken einer Pfarrersköchin bei der Christmette, während der Kirchenchor auf der Empore singt:

Stille Nacht, heilige Nacht,
jetzt wird wieder dia Mette g'macht.
Sie fanget ja scho a zom Leita,
ab'r heit gang i beizeita,
dass i no an Sitzplatz kriag,
drum nix wia nauf und nei en d'Kirch.
Alle gant se heit en d'Metta!
Mei, send meine Schua voll Lätta.
Guck dean scheana Christbaum a,
mit de viele Kerza dra.

Singat diea scho's Kyrie?
Wieder han'er heu'r koin Schnee.
Schneit's nau doch no a paar Flocka,
nau wärst wirklich von de Socka.
All's isch b'setzt! Ja meine Herra
Des ka wieder lustig wera. -
Bloaset diea heit mit Trompeta?
Guck dean Maa da a, dean fetta.
Morga Aobet gibt`s g'selchte Ripple,
ja, dau liegt's au scho em Kripple
s'Christkind, ja isch des schea,
dau bleib i jetzt a bissle stea.
Noi i gang zom Hochaltar,
wo i vorig's Jahr au war!

Gloria in Excelsis!
Hei, dau deana sitzt Badr's Lies,
mei, a Gaudi macht heit d'r Chor,
s' moischte G'schrei kommt vom Tenor.
Mensch, muaß der sei Maul aufreißa.
So, jetz ka ia a bissle beta.
Mei, send meine Schua voll Lätta.
Ab'r schea is d'Kirch heuer
wieder hergricht! Des kommt teuer!
Dean scheana Christbaum, die viele Kerza,
ja, des gat oim wirklich z`Herza.

Was, jetzt send se erst beim Credo?
Jetzt hant mir heit d'Fiaß no net wehdoa.
Ja - jetzt hocket d'r Pfarr au no nieder,
mir wird des jetzt scho langsam z'wieder.
S'Käpple setzat se au no auf,
Mensch, schea langsamm pfeif' i drauf
Auf dia Musik ond auf dean G'sang,
jetzt daurat mir's schon langsam z'lang.
Weil sie's kürzer macha kennt'n.
Mei, i frei mi scho auf unsra Ent'n.
So, jetzt machet endlich weitr,
guggat, dass'r fertig werat, des isch g'scheitr.

Sanctus, sanctus Dominus!
Jessas, isch jezt no it Schluß ?
Jetzt kommt erst no d'Wandlung, moin' i,
Menschenkind, plärrt em Chor drobe wieder oine.
Hei, da wird's oim Angst und Bank,
jetzt herat sea auf! Gott sei Dank!
So, jetzt muaß i mi aber niedrknia,
was wird heit doch n all's Passiera.
Wie i mi heit auf's Bettgang g'frei,
so, dia Wandlung isch jetzt au vorbei.
Mei, m'r woiß scho, protzig war
Alleweil scho eis'r Pfarr.
Dean Rauchmantel, han i no it g'sea:
Vom G'nack bis zu de Fersa glänzt 'r voll
Gold. Mei, isch dea schea.
Hoffentlich sitzet se it no'mal auf ihre Stühl',
woisch, itz wird mer's doch langsam z'viel.
Mei diea räuchret uns heit ei.
Mir wird's ganz schlecht, wenn ma des schnaufet ei.

Ah' jetzt singt'r Pater noster,
so a Rauchmantel, mei, der kostet ,
tauset Mark, des schätz i Ma,
ab'r mei: wer ka, der ka!
Isch ja au bloß eimal Weihnacht
Em Jahr. Oho, was kracht denn em Chor dobe gar so laut?
Wie der wieder auf sei Trommel haut!
Der wird scho au d'rnach vediene,
sonst tät er it a so blöd spinna.
Hat diea Kirch da hohe Maura,
des muaß doch ganz schea lang daura,
bis ma so a Mauer baut!
Gibt's jetzt morga Sauerkraut?
I verlang nach gar nix süaß.
Noi, i sag' des meine Füaß
Donn mer allweil no weh'r!
Bin i denn a Postasteher?

Agnus Dei, agnus Dei!
Wenn mer's z'domm wird, nachher geh' i
Mitte ondram Amt drvo,
weil i nomma standa ko.
Isch der neue Korporator
Au a so a lansamer Pater
Als wia eisr Katechet?
Mei, i frei mi auf mei Bett

I bring d'Auge scho kaum mea auf vor Schloaf,
hoffentlich schloaft au s'Kätzle brav!
Mei, des Kätzle hat's halt schea,
des braucht it en d'Mette gea!
Gibt's des au, i bin stoimüad,
jetzt wird au no kommuniziert!
Ja, Krein-Birnbaums-Element,
nimmt dia Mette gar koi End?
Dia sollet doch am Tag kommuniziera,
i, i daät mi scho schiniera!
Glei hock i mi jetzt auf da Boda,
schada tät's ihm it, meim Loda.
Ab'r auf die kalte Stoi na,
mei, mir isch scho bald zum Woina!

Ite ite missa est!
Handr's g'heart? Jetzt hau no fest
Auf die Trommel nei, dass staubt!
Noi, i hau scho nomme glaubt,
dass i des no übersteh!
S'Kreiz, des tut mir au scho weh!
Ab'r schea war's doch, die Mette!
Näch'ts Jahr gang i wieder,
des ka i heit scho wette!

Zusätzliche Informationen