Ganz abglega von dr Welt, am Auerberg doba, im Einödhof hinter Pracht und a Stund vo Stötta weg, liegt d'Hoimat vom Jörgele. Jetzt ischt s'Jörgele scho 4 Jahr alt und ischt seit dr heilig Tauf nie mea it auf Stötta nakomma. Scho alleweil plogt s'Jörgele an Vattr und d'Muttr, daß se ehn amol mitnehma sollet nauch Stötta.
D set d'Muttr: Jörgele , hat se gset, wenn Du die Woche ganz brav bischt, do darfscht du am heiliga Obad wenns schea Wetter ischt, mit in d'Christmetta uf Stötta na. Dr. Vattr bleibt nocha dahoim und tut eiser Haus hita. Woll, woll set do dr Vattr, mir ischt dös scho recht Jörgele, aber daß Du dr Muttr koine Qeschtiona machscht. Noi, noi Vattr hat s'Jörgele gset, i mach dr Muttr koine Queschtiona.
Wie no am heiliga Obad d'Muttr und s'Jörgele von dahoim fut sind, hot dr Vattr no gset, Jörgele hot'r gset, Jörgele, tu frei brav sei und paß in dr Kircha o recht gut auf, daß Du alls siechscht und hörscht, damit mr nocha alls verzöhla kascht, wenn Du hoimkommscht. Woll, woll hat's Jörgele gset, i paß guat auf Vattr.
Mei, hat des Bübla glugat, wie's die viela Häuser gsecha hot. Und gar erscht in dr Kircha dinna. Er hot it gnua luaga könna. d'Händla hot'r aufkoba zum Beta und hot gluaggat auf'n Pfarrer und d'Emproa nauf, wo's musiziert und gsunga hant.
Und vor lautr luaga isch'm Jörgele was passiert. Es ischt auf oimal a kleine Lach Wasser übr Kirchabank nagloffa. S'Jörgele hot's gar it gmerkt vor lauter umanandluaga. D'Mutter isch a bißle in Verleagaheit grota und hot gwischpert. Jörgele, Jörgele jetzt machscht mr doch no Queschtiona.
D'Weiber nebadan und in dr hintre Bank hand bloß a bißla glacht und hand gset: Laß nur des Büble, es ischt ja so brav.
Noch dr Christmetta hot Muttr no an Bsuch beim Vettr gmacht, a viertele Wein hand'se mitanand trunka und no sind's mea hoimganga. Wie's hoimkomma sind set dr Vattr: Na Muttr wie ischt dr's denn ganga mit'm Jörgele, hot's dir koina Queschtiona gmacht? Noi set d'Muttr, Queschtiona hot'r it gmacht, bloß a bissla Wasser hot'r auf Kirchabank nagmacht vor lauter umanandrluga.
Izt verzähl mr amol, set dr Vattr zum Jörgele, was alls gsecha und g'hört hoscht indr Kircha. Nochat hot's Jörgele zum Verzöhla agfana und hot gset: Mei isch die Kircha a riesigs Haus, ganz gwiß s'allergröscht auf dr ganza Welt. Zerscht hand'se auf'm Tura doba ganz fescht zum Läuta agfanga. Nochat sind gar alle Leut vo Stötta in d'Kircha reikomma. Die letzta hand gar koin Platz mea krigt und hand vor dr Haustür warta miaßa. Mindestens vier Milliona Leut sind des gwesa. Do hot dr Vattr gset, Jörgele, i moin allaweil, izt übertreibscht a bißla. Ja, abr so zweihundertfuchtsgtaused sind's ganz gwiß gwesa hot s'Jörgele gset. Sell kommt mr o no a bißla viel vor, moint dr Vattr. Abr, s'Jörgele verzählt weiter:
Vorn ischt a großr Tisch gwea und do ischt a Ma higloffa, dea hot a weiß gschtickts Hemd aket, mit a paar Buba, di o im Hemd umanand gloffa sind. Nochat hot der Ma aus am Buch gleasa und hinda in dr Kircha auf am Balkon doba, hand'se drauf ganz laut gspielt und gsunga. Do hot aber dr Ma da vorn naufplärret zu dena da doba, und nochat hand die mea ragschimpft. Wie sich der Ma amol umdreht hot, hot ihm oiner von dena hura Bua gschwind s'Buch weggnomma und auf die andra Seita vom Tisch nagstellt. Mochat hot der Ma von det aus weiterglesa. Nochat hat'r übers Hemd a anders Häs azoga, ischt an dr Seita von dr Kircha d'Steffala naufg'humplat und in a groaß Krautfaß neigstanda. D'Muttr hot mr gset, des sei a Kanzl. Da dob hot er no gschimpft und lamentiert von am Teufl und vom höllischa Fuier, wenn d'Leut it brav sind. Nochat ischt er mea ra zu seim Tisch, hot's Überhäs auszoga und in seim Buch weitergläsa.

Zusätzliche Informationen