Geschenk: Klopapier

 

Liebes Brautpaar, verehrte Hochzeitsgäscht

Wochalang hand mir miassa denka,
was ma ui zwei kennt zur Hochzeit schenka.
Überlegt hand mir hin und her,
a g'scheits Hochzeits-Gschenk finda, isch frei schwer.
Was soll ma au kaufa, Zuig hand dir ja gnua,
Stiefel, Socka, Strümpf und Schua,
von dr' hoha Schüssel bis zur flacha,
eis war's mit dr' Zeit frei nimma zum Lacha!
Und doch, es sollt ebbas Richtigs sei,
it bloß a Glump in Kasta nei.
Zletscht sind mir doch no auf ebbas komma
Und die Last war von eis gnomma.

Was des isch? Dir verrotets kaum,
des fällt ui it amol ei im Traum.
Zum Essa und Trinka kanns nix sei,
weil sowas traget mir it in a Wirtschaft nei.
S' isch koi Hafa und koi Deckl derzua,
davo hand dir sicher gnua.
S' isch koi Hemd und koi Hos,
koi Nelka koi Ros.
Aber s'duftet fast so wie dia
Und s' isch a Belohnung für a große Müh.
Wichtig isch es, glaubets wenn is sag,
braucha wered ihrs jeden Tag.

S' isch koi Schafel, au koi Besa mit Stiel,
gell, jetzt bleibt scho nimma viel.
Vielleicht isch es gar a Mucka-Spray,
oder a Mittel gega Laus und Fleh?
S' sind koina Dragee und Tabletta kunterbunt,
des brauchet dir it, ihr sind ja gsund.
Au Salba und Crema sind des koi,
weil schea sind dir ja vo ganz alloi.
A Klavier ka au it dinna sei,
des ging in die Schachtel gar it nei,
a Sofa-Kissa wolltet mir it nei packa
sonscht dätet dir da ganza Tag aufs Kanapee naflacka.

Ihr glaubat's it ihr lieaba Leit,
was es heitzutag zum Kaufa geit.
Aber des da isch ebbas wichtigs, wie i scho sag,
und hoffentlich brauchet ihr's jeden Tag.
Ob derhoi oder anderswo
d' Hauptsach isch, es isch ois do!
A Geld isch es kois, weil des koi Glück it bringt,
au koi Bachstoikäs, weil der so stinkt.

A leera Schachtel stellet mir au it na,
denn auf da Inhalt kommt's doch a.
Und wie solls au anders sei,
zur Hochzeit schenkt ma meistens ebbas in d' Wohnung nei.
Aber des Richtige finda isch frei schwer,
hoffentlich paßt's vom Muster her!

Was kennt jetzt do dinna sei? Die Frag isch no offa,
aber das dr's glei auspacket, wollet mir hoffa!

Und .............(Name), des oine muascht verstau,
deiner Frau sollscht au no was übrig lau!
Wisset ihr's jetzt immer no it?
Na gib i ui an guata Tip.
S' isch furchtbar lang und oft no z'kurz,
aber koi Schnur it, und koi Schurz.
Doch braucha duats der Ma und s' Weib,
it für da Kopf, noi für da Leib.

Was moinet ihr, was kommt da raus,
s' isch koi Katz und au koi Maus.
Was moinet ihr ? jetzt packets halt aus,
da Teifel springt ganz gwiß it raus.

Jetzt luagat!!

Sind koi Kuacha, koine Stolla,
s' sind lauter runde, nette Rolla.
Jetzt hoffat mir bloß, wenn dir so viel hand,
das dir's au fleißig braucha dand.
A richtige Farb isch hoffentlich für jeden dabei,
it das es glei an Ehesteit geit, bei ui zwei.
Und jetzt dand des Gschenk no guat verstaua,
sonscht fanget die Hochzeitsgäscht no a zum Klopapier klaua