Glückwunschtexte Rund um Geburtstag, Hochzeit, Weihnachten uvm.

Kommsch Du amaul in Ruhestand,
erwartet Dich - Freinderl - allerhand.
Wenn Du glaubscht, Du hättescht jetzt dei Ruah,
s' kommt jeden Tag no mehr dazua.
Kaum fühlsch Du Di alls freier Ma,
dann fängst's scho mit dem "Dätschmer" a'.
Denn jede Frau hat schnell kapiert,
dass dr Vater gern in d' Stadt marschiert.
Dätschmer it (was wead dia wolla?)
irgendwas vom Kaufhaus hola.
Anstelle von am Ruheständler
wirsch jetzt zmaul a Einkaufspendler:
Gehsch Du gemächlich durch dia Gass'n,
dann siehgscht se scho mit Netz und Tasch'n.
Da fällt dr' Groscha, so wird's sei,
des miassat Leidgenossa sei.
Gehsch Du dann auf'n Wochamarkt,
wo mancher Einkaufswaga parkt,
entdeckscht Du bald mit Kennerblick
den sogenannten "Dätschmer-Typ".
Du schleichscht ihm nach und findescht raus,
der schnüffelt erscht dean Marktstand aus,
wie er auf raffinierte Weis
no drucka ka, dean Handelspreis.

Isch er in Ruah dahoim,
dann gehts scho wieder a;
s' Weiberl sagt: mei lieaber Ma,
dätschmer it dean Dreck ausleara,
dätschmer it dean Hausgang keahra,
dätschmer it mei Kreiz eireiba,
dätschmer it die Weschp (Wespe) vertreiba,
dätschmer it zum Metzger laufa
und dia bschtellte Weißwischt kaufa,
dätschmer it a Bier rauf holla,
dätschmer it dia Schuah zum Sohla,
dätschmer it dia Fenster putza,
dätschmer it dia Hecka stutza,
dätschmer it dean Teig nei rühra
und an Waldi Gassi führa,
dätschmer it des Obscht entkerna
und am Enkerl s' Rechtschreiba learna,
dätschmer it d' Garta spritzn
der braucht a Wasser bei der Hitzn.

Freinderl, s' Zeitungleasa kasch vergessa,
spursch it, gibt's koi Mittagessa.
Samstag krieagsch Du dann zum Heara:
Dätschmer it a bissla moppa
und dann glei dean Teppich klopfa.
Verfall bloß it in Müßiggang,
denn dann leabsch frei nimma lang.
"Dätschmer it" heißt's 20-maul täglich,
manchmaul wird's fascht unerträglich.
Ja, da ka ma halt nix macha,
a "Dätschmer it" hat nix zum Lacha,
so isch's hald in dr' Wirklichkeit:
"A Ruheständler" hat nia Zeit!